Президенттин милдетин аткаруучу, Жогорку Кеңештин Төрагасы Талант Мамытов бүгүн, 19-декабрда Жалал-Абад облусуна иш сапарынын алкагында Камбар-Ата ГЭС-2нин экинчи блогун ишке киргизүү долбоору менен таанышты.
Кыргызстанда Нарын дарыясы электр энергиянын негизги булагы болуп саналат, анда төмөнкү суу электр станциялары жайгашкан — Токтогул, Күрпсай, Таш-Көмүр, Шамалды-Сай, Үч-Коргон жана «Камбар-Ата-2».
Камбар-Ата ГЭС-2нин жалпы долбоордук кубаттуулугу 360 МВт (ар бири 120 МВт үч блок). Азыркы учурда бул жерде 120 МВт кубаттуулуктагы биринчи блок иштеп жатат, расмий түрдө 2010-жылдын 30-августунда пайдаланууга берилген.
Экинчи гидроагрегатты ишке киргизүү үчүн инвестицияларды издөөнүн натыйжасында Евразия Өнүктүрүү Банкы жана Евразия стабилдештирүү менен өнүктүрүү фондусу менен жеңилдетилген насыяларды тартуу боюнча келишим түзүлдү.
«Камбар-Ата ГЭС-2нин экинчи сууагрегатын ишке киргизүү» долбоору 120 МВт кубаттуулуктагы станциянын экинчи сууагрегатын ишке киргизүүнү, ошондой эле 500 кВт (ОРУ) ачык бөлүштүрүүчү түзүлүштү курууну камтыйт.
Ошондой эле, азыркы учурда, Камбар-Ата-2 жана Күрпсай ГЭСтеринин ортосундагы 110 кВ аба электр чубалгыларынын өткөрүү мүмкүнчүлүгүнүн чектелгендигине байланыштуу, Камбар-Ата ГЭС-2нин биринчи блогу мүмкүн болгон 120 МВттын ичинен 80-90 МВт гана жүк менен иштеп жатат.
500 кВ ОРУ курулманын курулушунан кийин, биринчи агрегаттын «жабык» кубаттуулугун бошотуп, 40 МВтка жакын кошумча өсүш алууга болот. Бошотуунун натыйжасында Камбар-Ата 2 ГЭСинин жалпы кубаттуулугу 240 МВтты түзөт жана ошондой эле өндүрүлгөн кубаттулукту «Датка-Кемин» линиясына берүүгө мүмкүнчүлүгү берилет.
Талант Мамытов плотина жана машиналык цехти көрүп чыкты, ошондой эле Камбар-Ата-2 ГЭСинин иши жана курулуш иштеринин жүрүшү жөнүндө маалымат менен таанышты. Ал куруучулар жана энергетиктерди мамлекет бул ири долбоорду ишке ашырууга ар тараптуу жардам көрсөтөт деп ишендирди.