Япониянын Ниигата жана Хёго шаарларында калың жааган кардан улам кеминде 9 миң турак жай электр жарыгысыз калды. Бул тууралуу «NHK» телеканалы маалымдады.
Аталган аймактарда 3 күндөн бери кар басылбай жаап келет.
Ниигатада абал оор экендиги байкалууда. 14-декабрь кечинде башталган кардын калыңдыгы 2 метрге чейин жетип, транспорттук каттамдардын токтошуна алып келген. Жүздөгөн унаа карга тыгылып, көчөдө калган.
Кардан 15 адам жабыркаган. Оор кырдаалга байланыштуу өлкөнүн премьер-министри кризистик штаб түздү.