Жогорку Сот Улуттук коопсуздук боюнча мамлекеттик комитетинин 9-башкармалыгынын мурдагы башчысы Дамир Мусакеевге карата чыккан өкүмдү жокко чыгарды. Мындай чечим 9-декабрда кабыл алынды.
Маалыматка караганда, Мусакеевге карата ачылган кылмыш ишинин материалдары кайра кароо үчүн Бишкектин Свердлов райондук сотуна жиберилди.
Дамир Мусакеевге мыйзамсыз баюу жөнүндө кылмыш иши козголуп, кызматта турган 2010-жылдан 2017-жылга чейин 20 миллион сомдук мүлктү мыйзамсыз сатып алгандыгы аныкталган.
2019-жылдын 24-майында Бишкектин Свердлов райондук соту Мусакеевди 5 жылга эркинен ажыратып, мамлекетке 70 миң сом айып пул төлөөгө милдеттендирген.
Дамир Мусакеев Алмазбек Атамбаев президент болуп турганда анын жан сакчысы болгон.