Бишкекте коронавирус боюнча кеп-кеңеш берген 118 кызматынын колл-борбору операторлордун саны көбөйгөнүнө байланыштуу №2 орто мектептин имаратына көчүрүлдү. Бул тууралуу мэриянын маалымат кызматы кабарлады.
Ага ылайык, учурда 40 клиникалык ординатор, ыктыярчы медик күнү-түнү телефон чалууларга жооп берип жатат. Алар Саламаттык сактоо министрлигинин алгоритми боюнча кеңеш беришет.
Саламаттык сактоо министрлигинин 28-июндагы буйругуна ылайык, мобилдик бригадалар чалуу түшкөн үйгө барып ПЦР-тест албайт. Алар бейтаптын абалын текшерип алгачкы диагнозун аныктайт.
Мындан сырткары, жарандар үй-бүлөлүк медицина борборлоруна кайрылып, кеңеш ала алышат.