Ушул жылдын алгачкы төрт айында 44 балага физикалык зордук-зомбулук, 24 бала сексуалдык ыдык көрсөтүүгө кабылып, 12 бала психологиялык зомбулукка кабылган. Бул тууралуу Эмгек жана социалдык өнүктүрүү министри Улукбек Кочкоров бүгүн, 1-июнда Бюджет жана финансы боюнча комитетинин жыйынында билдирди.
Анын айтымында ошол учурда 51 жашы жете элек бала жумушка тартылган.
» 2018-жылы декабрда, 2019- жылы январда балдардын үстүнөн зордук-зомбулук болгон 8 факты катталган. Алардын төртөө балдардын өлүмү менен аяктаган. Ошондон баштап Республикалык деңгээлде ар бир райондо штаб уюштурулуп, 700 миң үй-бүлөнү үймө-үй кыдырып, 106 миң 975 мигранттардын балдары учетко алынган. Ошол учурда эч кандай коомчулукка жетпеган, жашырылган 51 үй-бүлөлүк зордук- зомбулукка кабылган факт аныкталган. Анын ичинен 27си сексуалдык ыдык көрсөтүү болгон» , — деди Улукбек Кочкоров .
Улукбек Кочкоров билдиргендей, 106 миң мигранттардын балдары каттоого алынгандан кийин дагы 4 бала үй-булөлүк зордук- зомбулуктан көз жумган. Себеби, аларды маниторингге алган кызмат жок болгон. Ошондой эле 106 миң баланын ичинен 5 миң 600 бала абсолюттук тууганчылыгы жок, коңшусуна, классташтарынын кароосунда калган.