Эл аралык валюта фондунун директорлор кеңеши Өзбекстанга коронавируска каршы күрөшүү үчүн 375 миллион доллар бөлүү чечимин кабыл алды. Бул тууралуу аталган фонддун сайтында маалымдалды.
«ЭВФтин Аткаруу кеңеши Өзбекстандын COVID-19 пандемиясына каршы күрөшүнө насыя берүү жана тез каржылоо куралы аркылуу 375 миллион доллар бөлүүнү жактырды», — деп билдирди фонд.
Жеңилдетилген насыяларга 10 жылдык мөөнөткө 125 миллион доллар өлчөмүндөгү пайызсыз насыя линиясы жана 5 жылдык мөөнөткө жылдык 1,05 пайыздык үстөк менен 250 миллион доллар өлчөмүндө тез каржылоо куралдары кирет.
Бул каражат дүйнөлүк кризистин жана коронавирустун пандемиясынын терс таасирин азайтуу боюнча иш-чараларды каржылоо үчүн Кризиске каршы фондду толуктоого жумшалары Өзбекстандын Каржы министрлигинин Telegram каналында айтылды.