Коронавирус эпидемиясы тарап жатканына байланыштуу UFC уюму жакынкы убакта боло турган 3 турнирди белгисиз убакытка токтотту.
Убактылуу токтотулган турнирлер:
- 21-март, Лондон
- 28-март, Колумбус
- 11-аперель, Портленд
UFC уюмунун президенти Дана Уайт кызматкерлерине кат жиберип, уюмдун бардык кеңселерин 31-мартка чейин жаап, үйдөн иштөөнү сунуштаган. UFC уюмунун институту дагы 31-мартка чейин жабык болот.
Дана Уайт жиберген билдирүүдө: «UFC 249 турнирин өткөрүү пландалган боюнча күчүндө калат. Бирок боло турган жер гана алмашышы мүмкүн», — деп айтылат.
Ошондой эле жакынкы жумаларда же айларда аталган уюмдун кызматкерлерине же үй-бүлөлөрүнө медициналык жардам керек болсо, жардам берүүнү сунуштады.
UFC 249 турниринде UFC уюмунун жеңил салмактагы чемпиону Хабиб Нурмагомедов менен америкалык мушкер Тони Фергюсон беттешет. Беттеш 2020-жылдын 18-апрелинде Нью-Йоркто өтөрү айтылган болчу. Буга чейин UFC уюму аталган 2 мушкердин беттешин төрт жолу уюштурууга аракет кылганы менен ишке ашкан эмес.
«Эгер Хабиб — Фергюсонду, Конор – Серронени жеңсе, Конор менен Хабибдин реваншы тууралуу карап чыгабыз»,- деп белгилеген Уайт.