Мамлекеттик салык кызматынын 77 кызматкери (салыкчы) тартиптик жазага тартылды. Бул тууралуу мекеме бүгүн тараткан билдирүүдө айтылат.
Кызматкерлер тартиптик жазага 2019-жылдагы пландын аткарылышы боюнча коллегиянын чечимдерин аткарууда кетирген кемчиликтери үчүн тартылышкан.
Тактап айтканда, аймактык салык органдарынын 4 бөлүм башчысына катуу сөгүш жарыяланды. 8 салык органынын жетекчиси, жетекчинин 1 орун басары, 4 бөлүм башчы жана укуктук маселе боюнча 2 адис сөгүш алышты.
«Ошондой эле 28 салык органынын жетекчиси, жетекчинин 6 орун басары, 16 бөлүм башчы жана укуктук маселе боюнча 8 адиске эскертүү берилди», — деп айтылат маалыматта.