Бишкектин Карагач токоюнда 13-октябрь саат 10:00дө «КАРАГАЧ-TRAIL» аталышындагы велосипед тебүү боюнча мелдеш өтөт. Бул тууралуу Бишкек шаардык мэриясынын маалымат кызматы билдирди.
Мелдешке жашы 18ден жогору бардык каалоочулар катыша алат. Ошондой эле, 16-18 жаш арасындагы өспүрүмдөр ата-энесинин же ага жооптуу адамдын кагаз жүзүндө макулдугу менен катышат.
Катышуу үчүн негизги талаптар:
- Велосипеддин дөңгөлөгүнүн диаметри 26, 29 дюйм болушу керек;
- Катышуучулардын атайын баш кийими болуусу шарт;
- Паспорту сөзсүз болушу керек;
- Кошумча коопсуздук үчүн бутту, колду сактай турган жабдыктарды алып алса болот.
Мелдеш 5 категория боюнча өткөрүлөт:
- «Мастер-Класс» – катышуучулардын жашы 16дан 50гө чейин. Мелдеш талаасын 5 ирет айланат;
- «Элита» – катышуучулардын жашы 16-50гө чейинки велосипеддин ар түрдүү мелдештеринде байгелүү орундарды ээлегендер. Мелдеш талаасын 7 ирет айланат.
- «Ардагерлер» – катышуучулардын жаш курагы 50дөн жогорулар. Мелдеш талаасын 4 ирет айланат.
- «Электрбайк» – электр энергиясы менен жүргөн ар кандай велосипеддер. Мелдеш талаасын 7 ирет айланат.
- «Кыздар» – Мелдеш талаасын 5 ирет айланат.
Мелдештин талаасы айлампа түрүндө жасалган, узундугу 2 километрге жетет.