Бишкекте бешинчи класстын окуучусуна футболдук дарбаза кулап түштү. Бул тууралуу Саламаттык сактоо министрлиги кабарлады.
Окуя Ак-Ордо жаңы конушундагы №96 мектепте болгон. Дене тарбия сабагы учурунда өспүрүмгө футболдук дарбаза кулап, ал эсин жоготкон.
Жабырлануучу учурда Бишкектеги №3 Балдар ооруканасынын нейрохирургия бөлүмүндө дарыланууда. Анын абалы жакшы экени айтылды.
Белгилей кетсек, аталган окуу жай 2016-жылы октябрь айында ачылган. Мектеп 960 окуучуга ылайыкташкан, бирок учурда 2 миң 950 окуучу билим алат.