Бишкекте жөө жүргүнчүнү сүзүп алган айдоочу «Тез жардамды» коштоп баратып каза болду

28-ноябрда Бишкекте жөө жүргүнчүнү сүзүп алган айдоочу «Тез жардамды» коштоп келе жатып каза болду. Бул тууралуу Бишкек шаардык ички иштер башкармалыгынан кабарлашты.

Маалыматка караганда, окуя күндүзгү саат 11:30 чамасында болгон. «Мерседес-Бенц Е320» үлгүсүндөгү автоунаанын айдоочусу Элебесов көчөсү менен түндүктү көздөй айдап бара жатып, Февраль көчөсү менен кесилишкен жерден жөө өтмөктөн өтүп бара жаткан 45 жаштагы жөө жүргүнчүнү сүзүп алган. Ал алган жаракаттарынын кесепетинен ооруканага жаткырылган. 

Ал эми «Мерседес-Бенцтин» айдоочусу жабырлануучуну алып бара жаткан тез жардам унаасын, өзүнүн автоунаасы менен коштоп бара жатып, Фрунзе жана Тыныстанов көчөлөрүнүн кесилишинен каза болгон.

Аталган факты Бишкек шаарынын ички иштер башкы башкармалыгында катталып, тиешелүү экспертизалар дайындалды. Тергөө иштери жүргүзүлүүдө.