Коргоо министрлигинин базасындагы 26 млн сомдук спорт комплекси мыйзамсыз сатылып кеткен. Бул тууралуу Башкы прокуратура билдирди.
Аскер прокуратурасы тарабынан Коргоо министрлигинин Бишкек турак-жай пайдаланууну камсыздоо базасында жүргүзүлгөн текшерүүнүн жүрүшүндө 26 млн сомдон ашык суммага бааланган МАМ-19 спорт комплексин мыйзамсыз сатып жок кылуу фактысы аныкталды.
“Бул факт боюнча Аскер прокуратурасы тарабынан Кылмыш-жаза кодексинин 210-беренеси («Ишенип берилген мүлктү ыйгарып алуу же коротуу») боюнча кылмыш иши козголгон. Тергөө иштеринин жүрүшүндө аталган базанын командири Ж.Э.Ш. кармалып, Бишкек гарнизонунун гауптвахтасына киргизилип, камакка алынды”,- деп айтылат маалыматта.
Учурда мамлекетке келтирилген зыяндын ордун толтуруу иштери жүрүп, кылмышка тиешеси бар башка адамдарды аныктоо боюнча тергөө аракеттери уланып жатканы айтылды.