Кыргызстандын Өзгөчө кырдаалдар министрлиги Ооганстанга гуманитардык жүк жеткирди.
25-сентябрда жөнөтүлгөн 120 тонна азык-түлүктөн турган гуманитардык жардам 28-сентябрда жергиликтүү бийликтин кампасына жеткирилгенин министрликтин басма сөз кызматы кабарлады.
Бул жардам Президент Садыр Жапаровдун тапшырмасы менен уюштурулганы айтылды.
Эскерте кетсек, президент Садыр Жапаров 2024-жылдын февраль айында бир нече өлкөлөрдүн Коопсуздук кеңештеринин башын бириктирген регионалдык жыйында, БУУнун 75-сессиясында да Ооганстанга гуманитардык жардам берүүгө чакырык таштаган.
Кыргызстандан буга чейин да аталган өлкөгө азык-түлүк, кийим-кечелер, балдар үчүн оюнчуктар жана дары-дармектер жеткирилген.
Жакында эле Кыргызстан экстремисттик уюмдардын тизмесинен учурда Ооганстанда бийликте турган «Талибан» кыймылын чыгарган.
