Быйыл 18-декабрдан тарта Бишкек – Москва жүргүнчү поездинин каттамы калыбына келтирилет. Бул тууралуу Кыргыз темир жолу мамлекеттик ишканасынан кабарашты.
3-6-сентябрда темир жол мекемесинин адистери Орусиянын Москва шаарында эл аралык жүргүнчү поезддеринин 2025-жылга карата кыймыл графигин иштеп чыгуу боюнча КМШ өлкөлөрүнүн темир жол администрацияларынын ыйгарым укуктуу өкүлдөрүнүн жыйынына катышты.
Анын жыйынтыгында Орусия жана Казакстан темир жолдору менен макулдашылган чечим кабыл алынып, 2024-жылдын 18-декабрынан тарта жумасына эки жолу каттай турган Бишкек – Москва поезд каттамын калыбына келтирүү белгиленди.
Бул поезд багыты 2022-жылы Москва транспорттук түйүнүн реконструкциялоо иштерине байланыштуу Самара бекетине чейин кыскартылган.
Мындан тышкары, 2025-жылы Бишкек – Казань багыты боюнча поезд жумасына бир жолу, ал эми Бишкек – Новосибирск багыты боюнча 8 күндө бир жолу каттамын улантат.
Билеттердин сатылышы жана баалары тууралуу кошумча маалымат берилет.