Ошто дачалардын биринде ысык шорпого күйүп калган наристенин өлүмү тууралуу шаардык милициянын басма сөз кызматы маалымат таратты.
Бир жарым жаштагы наристе Ош облустар аралык ооруканасынын күйүк-жараат бөлүмүндө дарыланып жатканда 29-август күнү саат 18:10 чамасында чарчап калган. Бул факты каттоого алынып, тергөөгө чейинки текшерүү иши башталган.
Ош ШИИБнын Ак-Буура милиция бөлүмүнүн ыкчам-тергөө тобу окуя болгон жерге барып, тийиштүү материалдар жыйналган. Наристенин ата-энеси 14-август күнү болжол менен саат 17:00 чамасында Ноокат районун Өсөр айылында жашаган тууганынын үйүнө конокко барган.
Үй ээси конокторго ток печкеге шорпо асып койгон. Ошол учурда, жаш бала өзүнөн чоң 3 жаштагы бир тууган эжеси менен кубалашып ойноп жатып, кайнап жаткан шорпого чалынып, денеси күйүп калган.
Аны Ноокат райондук оруканасына жеткиришкен, абалы оорлошкондуктан 16-август күнү Ош облустар аралык ооруканасынын күйүк-жараат бөлүмүнө которулган. Ал жерде дарыланып жатып, жарааты оор болгондуктан 29-августу күнү чарчап калган.
Наристенин ата-энеси эч кандай арыз доолору жок экендигин айтып, сөөктү соттук-медициналык экспертизага берүүдөн баш тартышкан. Азыркы учурда бул факты боюнча кошумча тергөөгө чейинки текшерүү иштери жүргүзүлүүдө.