Кыргызстандын математика боюнча курама командасы Улуу Британияда өткөн математика боюнча олимпиадада (International Mathematical Olympiad 2024 (IMO) биринчи жолу командалык эсепте 122 упай топтоп, 108 мамлекеттин ичинен 29-орунду ээледи.
Бул олимпиадада Кыргызстандан барган окуучулар бир алтын, үч күмүш медаль утуп, 2 ардак грамотага ээ болушту.
Алтын медалды № 61 мектеп-лицейинин окуучусу Назар Киргизбаев 29 упай менен алды. Даярдаган мугалими – Мамат Ишматов.
Күмүш медалды “Газпром Кыргызстан” мектебинин окуучусу Ян Бобрус — 24 упай), Эл аралык UWIS мектебинин окуучусу Элдар Искендеров — 23 упай, Жайыл баатыр атындагы жалпы билим берүү лицейинин окуучусу Искен Кенжебаев — 22 упай менен утуп алышты.
Ардак грамота ээлери — “Газпром кыргызстан” мектебинин окуучусу Нурсултан Эшперов — 13 упай, №70 мектеп-гимназия окуу-тарбия комплексинин окуучусу Султан Мусаходжаев — 11 упай).
Кыргызстандын курама командасынын олимпиадага барып келүү чыгымы толугу менен мамлекеттик бюджеттен каржыланган.
Окуучуларды олимпиадага мугалимдер Мамат Ишматов, Азамат Аскаров даярдашкан.
Эл аралык математикалык олимпиада 11-12-июль күндөрү Улуу Британияда өтүп, 600дөн ашуун окуучу катышты.
Олимпиаданын жыйынтыгы боюнча мамлекеттердин рейтингинде алдыңкы үчтүккө АКШ, Кытай, Түштүк Корея өлкөлөрү кирсе, Финляндия 36-орун, Казакстан 43-орун, Малайзия 44-орун, Эстония 47-орун, Швейцария 50-орун, Индия 51-орун, Өзбекстан 61-орун, Сауд Арабия 63-орунду ээледи.
