Ноокатта селдин кесепетинен каза болгондордун саны сегиз адамга жетти. Бул тууралуу Өзгөчө кырдаалдар министрлигинен кабарлашты. Куткарууулар дагы бир аялдын сөөгүн (аты-жөнү такталууда) табышты.
Буга чейин жети адам каза болгону белгилүү болгон, алардын арасында эки аял бар, калгандары 2008, 2012, 2013 жана 2016-жылы туулган өспүрүмдөр болгон.
ӨКМ дагы эки адамды издөө иштери уланып жатканын белгиледи.
28-июнда саат 16:10 чамасында Ноокат районунун Апшыр-Сай сайынан сел жүргөн. Анын кесепетинен көпүрөлөр, жолдор жана электр объектилери жараксыз абалга келген.
Апшыр-Ата эс алуу жайына жана Кезарт жайлоосуна баруучу жолду сел алып кеткендиктен, эс алууга чыккан 1400 адам түшө албай калган. 29-июнда ал жактан жалпы 1400гө жакын адам эвакуацияланды.
Министрлик 29-июндан 2-июлга чейин нөшөрлүү жамгырдан улам Мырзаке – Кара-Шоро унаа жолунун 18-28, 32-37, 44-56-чакырымындарында сел жүрүү, таш кулоо коркунучу бар экенин эскертти.