Жогорку Кеңеш «Жарандардын ден соолугун тамекини, никотинди керектөөнүн кесепеттеринен жана тамеки түтүнүнүн, аэрозолдун таасиринен коргоо жөнүндө» мыйзамга өзгөртүү киргизүү жөнүндө долбоорду биринчи окууда колдоду.
Мыйзам долбоорун Жогорку Кеңештин депутаттары Шаирбек Ташиев, Алишер Козуев, Бекмурза Эргешов, Айбек Маткеримов, Марлен Маматалиев, Исатбек кызы Аида демилгелеген.
Долбоорго ылайык, электрондук тамекини пайдаланууга тыюу салуу жөнүндө мыйзамды бузган жеке жактарга 40 миң сом, юридикалык жактарга 60 миң сом өлчөмүндө айып салынат.
Электрондук сигареттерди сатууга тыюу салуу жөнүндө мыйзамды бузуу жеке жактарга 50 миң сом, юридикалык жактарга 65 миң айып салууга алып келет.
Электрондук сигареттерди ташып келгендерге 150-200 миң сомго чейин айып салынат же бир жылдан эки жылга чейинки мөөнөткө эркиндигинен ажыратылат.
Талкууда депутат Эльвира Сурабалдиева жөнөкөй жарандар үчүн айыптын көлөмүн төмөндөтүүнү сунуштады.