Сузак районунда аткез жүк алып өтүү үчүн казылган тоннель табылды. Бул тууралуу Улуттук коопсуздук мамлекеттик комитети билдирди.
Кечээ, 19-мартта УКМК кызматкерлери Сузак районунда мыйзамсыз миграция жана аткезчилик боюнча текшерүү жүргүзүшкөн. Анда Бек-Абад айылындагы үйлөрдүн биринен Өзбекстандан жүк ташуу, жумушчуларды алып келип туруу үчүн казылган тоннель табылган.
Тоннелдин үйдөн түшкөндөгү тереңдиги 15 метр, ички жолдун бийиктиги 1 метр 70 сантиметр, жалпы узундугу 130 метр, анын ичинде Өзбекстандан Кыргызстанга чейинки узундугу 50 метр экени такталган.
Аткезчилик канал уюштурганы үчүн 1986-жылы туулган үй ээси кармалган. Учурда тоннель казууга тиешеси бар башка адамдарды кармоо, мыйзамсыз кирген товарларды аныктоо чаралары көрүлүп жатканы айтылды.