Министрлер кабинетинин төрагасы Акылбек Жапаров Бишкек жылуулук электр борборундагы штаттык эмес кырдаалдын кесепеттерин жоюу иштерин текшерди.
Ага 8-февралга карата Жылуулук электр борборунда жалпы активдүү кубаттуулук 300 МВтты түзүп, 9 от казан жана 4 турбоагрегат иштеп жатканы туурасында маалымат берилген.
«Бишкек жылуулук тармагы штаттык режимде иштеп жатат. Жылуулук жана ысык суу берүү толугу менен калыбына келтирилди. Оңдоп-тазалоо иштери бүгүн кечке жуук бүткөрүлөт, чатырды оңдоо иштери уланууда», — деген энергетика министри Таалайбек Ибраев.
Акылбек Жапаров андан кийин «Кыргызкөмүр» мамлекеттик ишканасына барып, Кара-Кече кенинен борбор калаанын ЖЭБине көмүрдү ташуу жана жүктөө процесси менен таанышкан, жетекчилик менен кеңешме өткөрүп, ишкананы жакынкы беш жылга өнүктүрүү планын тез арада сунуштоону тапшырган.