Бишкек шаардык соту активист, блогер Ырыс Жекшеналиевдин иши боюнча прокурордун апелляциялык арызын карап, Биринчи Май райондук соттун өкүмүн күчүндө калтырды.
2023-жылы 4-декабрда Ырыс Жекшеналиевге карата коюлган айыптар алынып, толук акталган. Андан кийин прокуратура Ырыс Жекшеналиевге карата райондук соттун актаган чечимине каршы шаардык сотко арыз берген.
Укук коргоочулардын маалыматына караганда, прокуратура 7 жыл сурап, ишти жаңы тергөөгө кайтарып берүүнү өтүнгөн.
«Полит узник» фейсбук баракчасынын администратору, блогер Ырыс Жекшеналиев 2022-жылы 14-августта УКМКнын мурдагы төрагасы Абдил Сегизбаевдин «Жетим-Тоонун» казылуусуна каршы чыккан эски видеосун жарыялагандыгы үчүн суракка чакырылып, камакка алынган.
Ага карата Кылмыш-процессуалдык кодексинин 278-беренесинин 3-бөлүгү (Бийлик өкүлдөрүнүн мыйзамдуу талаптарына баш ийбөө жана массалык баш аламандык уюштурууга чакыруу) менен кылмыш иши козголгон.