Түркиянын Стамбул шаарындагы Санта Мария католик чиркөөсүнө кол салуудан бир адам каза тапты. Маалыматты өлкөнүн ички иштер министри Али Ерликая «Фейсбук» баракчасына жазды.
Кол салуу бүгүн, 28-январда Стамбулдун Сарыйер аймагында жергиликтүү убакыт боюнча 11:40 (Бишкек убактысы боюнча 2:40) чамаларында, жекшембилик сыйынуу учурунда болгон.
Бет капчан эки адам чиркөөгө кирип келишип ок чыгарышкан. Андан Т. Ж. аттуу бир адам окко учкан.
«Куралдуу кол салууга айыптууларды кармоо үчүн иликтөө-тергөө иштери башталды. Жийиркеничтүү кол салууну кескин түрдө айыптайбыз», — деди Али Ерликая.
Түркиянын юстиция министри Йылмаз Тунч да бул куралдуу кол салууну айыптай турганын билдирип, прокуратура тарабынан иликтөө-тергөө иштери башталганын кабарлады.
«Бир адамдын өмүрүн алган кол салуу боюнча иликтөө иштерин жүргүзүүгө Стамбул прокурорунун орун басары жана да эки прокурор дайындалды. Тергөө кылдат жана ар тараптуу жүргүзүлүүдө», — деп жазды ал.