Сокулук райондук прокуратурасы сугатка бөлүнгөн акчаны кымырып алгандарга иш козгоду. Бул тууралуу Башкы прокуратуранын басма сөз кызматы билдирди.
Чүй облустук өнүктүрүү фондунун, Сокулук районундагы Кызыл-Туу жана Зууракан Кайназарова айыл өкмөттөрүнүн кызматкерлери Кылмыш-жаза кодексинин 337-беренеси (кызмат абалынан кыянат пайдалануу) менен айыпталып жатышат.
Маалым болгондой, «Сугат тармактарын капиталдык оңдоо» жана «Эски темир-бетон лотокторду алмаштыруу» долбоорлорун ишке ашыруунун алкагында айтылган мекемелер «Н.Л.» компаниясы менен келишим түзүшкөн.
Натыйжада келишимде көрсөтүлгөн иштер таптакыр аткарылбаганына карабай, мекемелердин кызматкерлери 2022-жылдын 24-августунда жасалма акт түзүшүп, компанияга 5 млн 773 миң 813 сом которуп жиберишкен.
Бул материалдар Сокулук райондук ички иштер бөлүмүнө өткөрүлүп берилгени, тергөөнүн жүрүшү көзөмөлдөнүп турары айтылган маалыматта.