Ошто бир айдан бери изделип жаткан адамдын сөөгү табылды. Бул тууралуу Өзгөчө кырдаалдар министрлигинин басма сөз кызматы билдирди.
Өткөн жылдын 21-декабрында «102» кызматына билдирүү түшкөн. Андан белгилүү болгондой, 1985-жылы туулган киши 19-декабрда Алай районунун Жаңы-Алай айылындагы үйүнөн чыгып кеткен боюнча кайтып келген эмес.
Туугандары айылды аралап өткөн каналга түшүп кетиши мүмкүн экенин божомолдошуп, күн сайын изделип жаткан.
Бүгүн, 17-январда Кара-Суу райондук өзгөчө кырдаалдар бөлүмүнөн 4 куткаруучу, ички иштер бөлүмүнөн 2 кызматкер, 15 жергиликтүү тургун издөөгө чыккан.
Натыйжада 12:24тө дайынсыз делип жаткан адамдын сөөгү табылган.