Бишкек шаарындагы Токтогул Сатылганов атындагы Кыргыз улуттук филармониясында Кыргыз Эл Баатыры, Кыргызстан Компартиясынын Борбордук Комитетинин акыркы жетекчиси Абсамат Масалиевдин 90 жылдыгы белгиленди.
Салтанатка Президент Садыр Жапаров баштаган бийлик өкүлдөрү, саясий-коомдук, маданий ишмерлер катышты.
Мамлекет башчысы өз сөзүндө Абсамат Масалиевдин ысымы ар бир кыргызстандыктын жүрөгүндө тазалык менен аруулуктун, абийир менен ар-намыстын, элге адилет кызмат кылуунун символу катары сакталып каларын белгилеп өттү.
Абсамат Масалиев 1933-жылы 10-апрелде Кадамжай районунун Алыш кыштагында төрөлгөн.
Алгач Кызыл-Кыя тоо-кен техникумун, андан кийин Москвадагы Сталин атындагы тоо-кен институтун аяктаган. Алгачкы эмгек жолун Кызыл-Кыя көмүр кенинен баштаган.
1961-жылы Ош облустук комитетинин өнөр жай жана транспорт бөлүмүнө жетекчи болуп дайындалган. 1962-1964-жылдары Алматыдагы Жогорку партиялык мектепте окуган. Ушундан тарта анын мамлекеттик-саясий ишмердиги башталган.
1985-жылы Кыргызстан Компартиясынын Борбордук Комитетине биринчи катчы болуп бекитилип, кыргыз мамлекетин эгемендик алганга чейин жетектеген.
2004-жылдын 31-июлунда Бишкек шаарында көз жумган.