Кыргызгидромет билдиргендей, 1-2-ноябрь күндөрү өлкө аймактарында аба ырайынын кескин өзгөрүлүшү күтүлөт. Өзгөчө кырдаалдар министрлиги айдоочуларга кайрылып, унаанын дөңгөлөгүн кышкыга алмаштыруу, алыскы жолго чыгууда дары-дармек, тамак-аш, суу, күрөкчө, дөңгөлөк чынжырчасын алууну, унаалардын ортосундагы 500 метр аралыкты сактоону сунуштайт.
Эртең, 1-ноябрга караган түнү Ысык-Көл облусунун көпчүлүк аймактарында, Чүй, Ош, Жалал-Абад, Нарын облустарынын айрым жерлеринде жаан, тоолуу райондордо кар жаашы мүмкүн.
Күндүз Чүй облусунун айрым жерлеринде жаан, тоолуу райондордо кар жаайт, калган аймактарда жаан-чачын күтүлбөйт.
Түнкүсүн жана эртең менен Чүй, Талас облустарынын айрым жерлерине туман түшөт. Батыштан келген шамалдын ылдамдыгы секундасына 4-9 метр, Ысык-Көл акваториясында 15-20 метрге чейин жетет.
Абанын температурасы:
Чүй облусунда түнкүсүн +2…+7, күндүз +10…+15,
Талас облустарында түнкүсүн +1…+6, күндүз +9…+14,
Баткен, Ош, Жалал-Абад аймактарында түнкүсүн +4…+9, күндүз +14…+19,
Ысык-Көл облусунда түнкүсүн +1…+6, күндүз +8…+13,
Нарын облусунда түнкүсүн -4…+1, күндүз +8…+13.
Бишкекте жаан жаайт. Абанын температурасы түнкүсүн +4…+6, күндүз +11…+13 градус жылуу болот.