ОшМУнун медициналык клиникасынын хирургия бөлүмүнүн башчысы профессор, врач-хирург, онколог Жанек Белеков баштаган 10 адис Туркиядагы Инөнү университетинин Тургут Озал атындагы клиникасында боор алмаштыруу боюнча атайын окутуудан өтүп жатышат. Алар дүйнөдөгү боор алмаштыруу боюнча белгилүү дарыгер, профессор Сезай Йылмаз баштаган дарыгерлер менен тажрыйба алмашууда. Бул тууралуу ОшМУнун басма сөз кызматы билдирди.
Өкмөттөр аралык келишимдин негизинде ишке ашып жаткан долбоор боюнча дарыгерлер 3 ай билимин өркүндөтүшөт. Мындай тажрыйба алмашууга алдыда дагы дарыгерлерди жөнөтүү күтүлүүдө.
Долбоордун алкагында тажрыйба алмашуу аракеттеринин натыйжасында ОшМУнун медициналык клиникасында жана курулуш иши жүрүп жаткан заманбап клиникада боор алмаштыруу сыяктуу оор операцияларды жасоо пландалууда.