Кыргызстанда Испаниянын белгилүү клубу «Барселонанын» футболдук академиясы ачылат. Бул тууралуу «ЖалГруп Азия»ААКсы билдирди.
Маалыматка ылайык, JalGroup Asia – «Барселона» академиясынын Кыргызстандагы франшизасынын расмий ээси. Компаниядан билдиргендей, дүйнөлүк белгилүү футболдук клубдун академиясынын филиалынын ачылышы Кыргызстанда футболдун өнүгүүсүнө өбөлгө түзөт. Футболдук академия Жалал-Абад жана Бишкек шаарларында ишмердүүлүгүн жүргүзөт. Буга чейин Жалал-Абадда чоң футбол комплекси салынганы да айтылган.
Белгилүү футболдук клубдун академиясынын франшизасын Кыргызстанга алып келген «JalGroup Asia» ААКсы Кыргызстандагы «Мурас Юнайтед Жалал-Абад» футболдук клубунун ээси болуп саналат. Маалыматтарда «JalGroup Asia» өзүн холдинг катары тааныштырып, футболдук клуб, спорттук иш-чараларды уюштуруу, футболду популярдаштыруу жана курулуш тармагында да иш алып барганын жазат.
Холдингдин президенти Алыбаев Айбек Ташибекович экени көрсөтүлгөн.
