Министрлер Кабинетинин Төрагасынын орун басары Бакыт Төрөбаев Майлуу-Суу шаарынын 2023-2024-жылдардын күз-кыш мезгилине даярдыгы менен таанышты.
Төрөбаев “Кыргызжылуулукэнерго” мамлекеттик ишканасынын “Майлуу-Суу жылуулук менен жабдуу ишканасы” филиалынын № 1 жана № 3 отканаларынын абалы менен таанышуу үчүн барды.
Бүгүнкү күнгө карата Майлуу-Сууда № 3 отканага жаңы суу куурларын орнотуу, “Артезиан” суусун тартып келүү иштери аткарылган. Учурда тартылып келген суу куурларга кое берилип, текшерүү иштери жүргүзүлүүдө. Капиталдык оңдоп-түзөөдөн өткөрүү иштери сентябрга чейин бүткөрүлөт.
Белгилей кетсек, № 3 отканага куурларды орнотуу, суу жеткирүү иштерине 2,7 млн сом мамлекеттик бюджеттен жумшалды.
Эскерте кетсек,ушул жылдын 13-январында аба ырайынын ызгаардуу суугунан улам, Майлуу-Суу шаардык суу менен камсыздоо ишканасынын суу куурлары тоңуп, шаар суусуз, жарыксыз жана жылуулуксуз калган. Мындан улам шаарга “өзгөчө кырдаал” режими киргизилип, кийин калыбына келтирилген болчу.