Автоунааны кайра каттоо учурунда милдеттүү камсыздандыруу (ОСАГО) полиси автоунаа ээлеринен талап кылынышы мүмкүн. Финансы рыногун жөнгө салуу кызматы буга байланыштуу токтом долбоорун сунуштады.
Аталган мекеме муну менен ОСАГО полисине суроо-талап көбөйөт деп билдирип, учурда автоунаасын камсыздагандардын саны аз болуп жатканын жүйөө келтирген.
Финкөзөмөл кызматы жарыялаган документте жол кырсыгы катталган учурда автокамсыздандыруу кайсы чыгымдарга жардам берери көрсөтүлгөн. Алар:
-унаа ээлери үчүн бардык финансылык тобокелдиктерди кыскартуу жана жабырлануучу тарапка зыянды төлөп берүү;
-үчүнчү жактын транспортун калыбына келтирүү жана ремонттон өткөрүүгө мүмкүнчүлүгү жок айдоочуларды социалдык коргоо менен камсыздоо.
Буга чейин 2023-жылдын 1-январынан тарта кыргызстандыктар үчүн ОСАГО полисин каттоо милдеттендирилген. Анда камсыздандыруу милдетүү болорун жана Кыргызстанда транспорттун бардык түрүнө киргизилери да айтылган.
Ушул жылдын 1-апрелинен тартып ОСАГО полиси жокторго айып салынары айтылып, жеке жактарга 3000 сом, ал эми юридикалык жактарга 13 миң сом деп белгиленген. Бирок парламентте бул маселе көтөрүлүп, өкмөттүн токтомун аткарууну 2024-жылдын 1-январына чейин убактылуу жылдырышкан.
Учурда Кыргызстанда 15 компания унааны камсыздандыруу кызматын көрсөтөт. Базалык камсыздандыруунун баасы — 1680 сом.