Президент Садыр Жапаров өлкөгө расмий сапар менен келген Кореянын Улуттук Ассамблеясынын төрагасынын орун басары Чонг У Тэкти кабыл алды.
Жолугушууда кыргыз-корей кызматташтыгы, өлкөлөр ортосундагы саясий, экономикалык жана маданий-гуманитардык тармактарда кызматташуу, парламенттер аралык алакалардын өнүгүп келе жатканы белгиленди.
Садыр Жапаров 2019-жылы Кореянын премьер-министри, 2021-жылы Улуттук Ассамблеянын спикеринин Кыргызстанга болгон сапарлары Кыргыз-Түштүк Корея кызматташтыгынын тарыхындагы маанилүү окуялар болгондугун айтты жана Кореянын президенти Юн Сок Ёлду Кыргызстанга расмий сапар менен келип кетүүгө чакырды.
Түштүк Корея менен Кыргызстан 14-июлда «Республикалык клиникалык-инфекциялык оорукананы функционалдык жакшыртуу» долбоору боюнча макулдашууга кол койду.
Садыр Жапаров Кыргызстандын жарандарына виза берүү маселелерине басым жасап, виза берүүнүн жеңилдетилген тартибин карап чыгууну өтүндү.