Жапаров Мирзиёевду президенттик шайлоодогу жеңиши менен куттуктады

Президент Садыр Жапаров Өзбекстандын президенти Шавкат Мирзиёевге президенттик шайлоодогу жеңиши менен куттуктады. Бул тууралуу Президенттик админситрациядан билдиришти.

Куттуктоосунда Садыр Жапаров Шавкат Мирзиёевге бекем ден соолук жана алдыга койгон бардык максаттарын ишке ашырууда ийгиликтерди, ал эми боордош Өзбекстан элине тынчтык жана өнүгүү каалады.

«Сиздин президенттик шайлоодогу ишенимдүү жеңишиңиз менен чын дилимден куттуктайм. Президенттик шайлоонун жыйынтыгы Сиздин Өзбекстан элиндеги бийик кадыр-баркыңыздын, республиканын туруктуу социалдык-экономикалык өсүшүн камсыз кылууга багытталган прагматикалык жана көрөгөч саясатыңызга болгон элдин ишениминин жана колдоосунун айкын далили.

Сиздин жетекчилигиңиз менен жүргүзүлүп жаткан реформалар, ошондой эле өлкөнүн мындан аркы өнүгүүсү боюнча мыкты идеяларды жана принциптерди ишке ашырууну көздөгөн кадамдар эл аралык аренада Өзбекстандын аброюн бекемдөөгө өбөлгө түзөт деп терең ишенем», — деп айтылат куттуктоодо.

Президент ошондой эле кыргыз-өзбек мамилелеринде эки тараптуу кызматташтыктын дээрлик бардык багыттарында болуп көрбөгөндөй жакшы өзгөрүүлөр орун алып, маанилүү биргелешкен инвестициялык долбоорлорду ишке ашыруу боюнча конкреттүү макулдашуулар болуп жатканын белгилеген.