Орусия Башкы прокуратурасы «Вагнер» жеке аскердик компаниясынын башчысы Евгений Пригожинге каршы куралдуу козголоң уюштуруу боюнча козголгон кылмыш иши жабыла элегин билдиргенин «РИА Новости» жазды.
«Пригожинге карата кылмыш иши токтотула элек», — деген булак кенен маалымат берген эмес.
24-июнь күнү эртең менен «вагнерчилер» Ростов-на-Донудагы аскердик объектилерди көзөмөгө алганы жарыяланып, Москвага бет алышкан. Орусиянын федералдык кызматы Евгений Пригожинге каршы кылмыш ишин козгогон.
24-июндун кечинде Беларусиянын президенти Александр Лукашенко Пригожин менен сүйлөшүү жүргүзүп, «вагнерчилердин» куралдуу кыймылын токтотууга келишишкен. Ошол эле кечте «Вагнердин» жалданма аскерлери Ростов-на-Дону шаарынан чыгып кете баштаган.
Буга чейин Кремлдин басма сөз катчысы Дмитрий Песков макулдашууга ылайык, Евгений Пригожинге каршы кылмыш иши токтотулуп, өзү Беларуска барарын билдирген.