Бишкек шаардык соту Туризмди өнүктүрүүнү колдоо фондунун жетекчиси Елена Калашникованы камакта калтырды. Бул тууралуу соттун басма сөз кызматы тастыктады.
Айыпталуучунун жактоочусунун өтүнүчү канааттандыруусуз калтырылды. Елена Калашникова 22-июлга чейин УКМКнын убактылуу кармоочу жайында болот.
22-апрелде Улуттук коопсуздук мамлекеттик комитети тарабынан аталган фондго Кылмыш-жаза кодексинин «коррупция» беренеси менен иш козголгон. 28-апрелде Елена Калашникованын үйү УКМК тарабынан тинтүүгө алынган. 18-майда Атайын кызмат Калашникова жана фонддун вице-президенти камакка алынганын билдирген.
УКМКнын маалыматында фондго бюджеттен уставдык капиталына 1 миллиард сом бөлүнгөнү, бирок каражат максатсыз пайдаланылганы айтылат.