Жети миллион рубль уурдаган деген айып менен соттолгон Кыргызстандын жараны Айнагүл Борбуева Орусиянын Новосибирск облустук соту тарабынан бошотулду. Бул тууралуу Тышкы иштер министрлигинен кабарлашты.
31-майда сот кыргызстандыктын адвокатынын даттануусун канааттандырып, Новосибирск шаарынын Октябрь райондук сотунун 2022-жылдын 27-октябрындагы өкүмүн өзгөртүп, аны сот залынан бошотту.
Эске салсак, 2021-жылдын ноябрь айында Новосибирск шаарында иштеп жүргөн Айнагүл Борбуева Новосибирск шаарынын ички иштер кызматкерлери тарабынан Кылмыш кодексинин 158-беренесинин 4-бөлүгүнө (өзгөчө ири өлчөмдө жасалган уурулук) ылайык кылмышка шектүү катары кармалган.
Кылмыш ишинин материалдарына ылайык, 2021-жылдын 5-ноябрында Орусиянын жараны В.С. 2021-жылы 4-ноябрга караган түнү мас абалында көчөгө 7 миллион рубль менен сумкасын унутуп кеткендигин айтып арыз менен кайрылган. Укук коргоо органдары тарабынан видеокөзөмөл камералары аркылуу сумканы кыргызстандык Борбуева алып, жумушуна алып барып койгондугу аныкталган.
2022-жылдын апрель айында кылмыш иши боюнча тергөө амалдары аяктап, иш Новосибирск шаарынын Октябрь райондук сотуна өткөрүлүп берилген. 2022-жылдын 27-октябрында Новосибирск шаарынын Октябрь райондук соту Борбуевага карата айыптоо өкүмүн чыгарып, аны 2 жыл 6 айга эркинен ажыраткан.
Бул маселе Кыргызстандын Тышкы иштер министрлиги менен Новосибирск шаарындагы Башкы консулдугунун көзөмөлүндө болгон.