Транспорт жана коммуникациялар министрлиги Төө-Ашуудагы тоннель аркылуу унаалардын өтүүсүнө маал-маалы менен чектөө киргизилерин кабарлады.
Чектөөнүн себеби электр кабелдерин алмаштырууга, дубалын актап-сырдоого байланыштуу экени айтылды.
Мындан улам эртең, 19-майдан тарта саат 5:00дөн 8:00гө чейин, 10:00дөн 12:00гө чейин, 14:00дөн 16:00гө чейин тоннель маал-маалы менен жабылып турат.
Бул учурларда коопсуздукту МАИ кызматкерлери көзөмөлдөйт. Чектөө болжолдо 28-июнда алынышы мүмкүн.
Айта кетсек, Транспорт жана коммуникациялар министри Тилек Текебаев 4-майда «Фейсбук» баракчасына быйыл Төө-Ашуудагы тоннель оңдоп-түзөлөрүн жазган.