Бишкек шаарында Улуу Ата Мекендик согуштагы Жеңиштин 78 жылдыгына карата өтө турган «Өлбөс полк» жүрүшү мурунку белгиленген убакыттан бир саат эрте башталат. Бул маалыматты «Өлбөс полк — Кыргызстан» кыймылы таратты.
Буга чейин катышуучулар 9:00дө чогулуп, 10:00дө жүрүштү баштаары айтылган. Өзгөрүлгөн убакытка ылайык, эми алар 8:00дө чогулушуп, 9:00дө Жеңиш аянтын карай жол алышат.
Жүрүш баштала турган жер жана жүрүү багыты өзгөрүүсүз калган. Тактап айтканда, катышуучулар Абдрахманов (Совет)-Масалиев көчөлөрүнүн кесилишиндеги Түштүк дарбазадан чыгып, Жеңиш аянтын көздөй келишет.
Айта кетсек, ушундай эле жүрүштөр Баткендин Кулунду айылында, Раззаков, Сүлүктү шаарларында, Ош шаарында, Жалал-Абад шаарында, Талас шаарында, Чүйдүн Ивановка, Сокулуктун Жаңы-Жер, Төмөнкү Чүй, Жаңы-Жер айылдарында (айыл тургундары Жаңы-Жерден Жаңы-Пахтага чейин жүрүш жасашат), Кемин районунун Кемин жана Орловка шаарларында, Аламүдүндүн Ленин айылында да өтөт.