Бүгүн, 2-майда Бишкек шаардык соту массалык башаламандык уюштурууга шектелип, кармалган укук коргоочу Рита Карасартова жана саясатчы Равшан Жээнбековдун баш коргоо чарасын карады.
Соттун чечими менен алар 20-июнга чейин камакта калтырылды.
Бүгүн мындан тышкары ушул эле иш боюнча абакта жаткан жарандык активист Эрлан Бекчоро уулу жана саясатчы Бектур Асановдун баш коргоо чарасы каралган, алар дагы 20-июнга чейин камакта калтырылды.
Саясатчы, активист жана блогерлер былтыр 23-октябрда массалык башаламандык уюштурууга айыпталып, кармалган. Аларга ички иштер министрлиги «массалык башаламандык уюштурууга даярдык көргөн» деген айып койгон.