«Манас» аэропортунун жолунда мектеп автобусунун катышуусунда болгон жол кырсыгы боюнча кылмыш иши козголду. Бул тууралуу Чүй облустук ички иштер башкы башкармалыгынын басма сөз кызматы билдирди.
Кылмыш-жаза кодексинин 312-беренеси (жол кыймылынын жана эксплуатациясынын эрежелерин бузуу) боюнча иш козголгон.
«Соттук-укуктук экспертизалар дайындалып, тергөө амалдары жүргүзүлүүдө. Тергөө Ички иштер министрлигинин жана Чүй облусунун ИИБнын жетекчилигинин көзөмөлүнө алынды», — деп айтылат маалыматта.
Милициянын маалыматына караганда, жалпы 27 окуучу ооруканага түшкөн, бүгүнкү күндө 16 бала ооруканадан чыгарылды, калган 8 окуучу андан ары дарылануусун улантат. Анын ичинен 1 бала жандандыруу бөлүмүндө, 1 бала травматологияда жана 6 бала нейрохирургия бөлүмүндө жатат.
20-апрелде «Манас» аэропортуна бараткан жолдо жол кырсыгы катталып, балдарды ташып бараткан автобус оодарылып кеткен.