«Эргүү» сыйлыгы бул жылы 27-март — Театрдын эл аралык күнүнө карата тапшырылат.
Сыйлык тапшыруу салтанатынын алдында саат 16:00дө «Ала-Тоо» аянтынан азем өтө турган жай — Т. Абдымомунов атындагы Кыргыз улуттук академиялык драма театрына чейин жөө жүрүш уюштурулат. Иш-чаранын расмий бөлүгү саат 17:00дө, майрамдык бөлүгү саат 18:00дө болот.
Кыргыз театр ишмерлеринин «Эргүү» улуттук сыйлыгы жыл сайын театр искусствосуна эмгеги сиңген инсандарга (актёр-актриса, режиссёр, декоратор ж.б.) жана жылдын мыкты спектаклдерине ыйгарылып келет.
Театрдын эл аралык күнүн майрамдоо боюнча токтом 1962-жылы Париждеги улуттук театрдын ачылышына байланыштуу эл аралык театр институтунун IX конгрессинде кабыл алынган. Ошол күндөн бери дүйнө жүзүндөгү сахна адамдары, анын ичинде Кыргызстанда да 1962-жылдан баштап 27-мартты кесиптик майрамы катарында белгилеп келет.
Маданият, маалымат, спорт жана жаштар саясаты министрлигине караштуу 22 театр оюн-зоок мекемелери чыгармачылык иш жүргүзөт. Анын ичинен 8 музыкалык-драма театры, 7 драма театры, 2 куурчак театры, 3 филармония 1 опера жана балет театры жана мамлекеттик цирк бар.
2022-жыл ичинде жалпы репертуардык спектаклдердин жана иш-чаралардын коюлушунун саны 2 519га жетти. Анын ичинен 75 репертуар жаңы коюлду. Тактап айтканда, 46 спектакль, 22 концертик программа, 7 цирк программасы тартууланды. Жалпы көрүүчүлөрдүн саны 730 миң 533дү түздү.