Кыргызстандын алты жараны Түркиядан Өзбекстандын Ташкент шаарына эвакуацияланды. Бул тууралуу Кыргызстандын Стамбул шаарындагы башкы консулдугу билдирди.
«Жергиликтүү убакыт боюнча саат 10:30да Кыргызстандын Түркиядагы дипломатиялык өкүлчүлүктөрүнүн жардамы менен Өзбекстандын атайын учагы аркылуу 6 жараныбыз Ташкент шаарына эвакуациялангандыгын маалымдайбыз. Элчиликтин жана Стамбул, Анталия шаарларындагы Башкы консулдуктун кызматкерлери мекендештерибизди эвакуациялоо жана кырсык болгон аймактарда ар тараптуу жардам көрсөтүү иш-чараларын улантууда» , — деп айтылат маалыматта.
Кыргызстан Түркиядан Казакстан аркылуу 22 жаранын эвакуациялаганын Тышкы иштер министрлиги 9-февралда билдирген. Казакстандын атайын рейси менен Астанага учуп барган кыргызстандыктарды элчиликтин жана диаспоранын өкүлдөрү тосуп алып, тамак-аш уюштуруп, автожол менен Кыргызстанга жиберишкен.