Кыргызстандык балбан Айсулуу Тыныбекова Хорватияда өтүп жаткан Zagreb Open эл аралык рейтингдик мелдешинде алгачкы атаандашына утулуп калды.
Бириккен күрөш дүйнөсүнүн (UWW) сайтында маалымдалгандай, Айсулуу Тыныбекова кыз-келиндер күрөшү боюнча 62 кг салмакта мелдештин тандоо турунда кытайлык Сяоцзюнь Луо (Xiaojuan Luo) менен күрөштү. Кытайлык балбан Тыныбекованы 10:4 эсебинде утуп алды. Эгер Луо финалга чыга турган болсо, Тыныбекова коло медаль үчүн күрөшүүгө мүмкүнчүлүк алат.
Бул мелдешке Айпери Медет кызы (76 кг) да катышууда. Ал 4-февралда Бишкек убактысы менен саат 15:00дө килемге чыгат.