Быйылкы жылдын 25-январынан 27-январына чейин Чүй облусунун айрым медициналык мекемелеринде онкологиялык ооруларга акысыз текшерүү жүрөт. Бул тууралуу Ден соолукту чыңдоо борборунан билдиришти.
Маалыматка ылайык, 3 күн ичинде 25 жаштан 60 жашка чейинки аялдар эмчек жана жатын моюнчасынын рагына текшериле алат.
Текшерүүдөн өтүү үчүн айымдар Чүй облустук үй-бүлөлүк медицина борборуна, Лебединовка айылындагы Үй-бүлөлүк дарыгерлер тобуна, Энергетиктер шаарчасы, Зеленая көчөсү, 1 дарегине (стоматология имараты, №1, 2, 3 кабинеттери) саат 12:00дөн 16:00гө чейин кайрылса болот.
Ден соолукту чыңдоо борборунан белгилешкендей, аталган акция Бүткүл дүйнөлүк рак менен күрөшүү күнүнө карата өткөрүлүүдө. Иш-чаранын негизги максаты онкологиялык оорулардын алдын алуу, дартты эрте аныктоо, жана дарылоо болуп саналат.