Карай-Суу районунун Кызыл-Кыштак айылынын башчысынын орун басары пара алып жаткан жеринен кармалды. Бул тууралуу Улуттук коопсуздук мамлекеттик комитетинин басма сөз кызматы билдирди.
УКМКнын Ош облусу боюнча башкы башкармалыгы тарабынан комплекстүү тергөө иш-чараларынын жүрүшүндө, Кылмыш-жаза кодексинин 343-беренеси (Опузалап пара талап кылуу) боюнча козголгон кылмыш ишинин алкагында, турак жай куруу үчүн жер тилкесин берүү боюнча мурда чыгарылган токтомду жокко чыгарам деп коркутуп, жергиликтүү тургундан 4 миң доллар өлчөмүндө акча талап кылган.
Кечээ, 11-январда 86 миң сом өлчөмүндө акча алып жаткан учурунда, Карай-Суу районунун Кызыл-Кыштак айылынын башчысынын орун басары 1988-жылы туулган М.Б.С. аттуу жаран кармалды.
Учурда аталган ишке тиешеси бар адамдарды аныктоо чаралары көрүлүп, тергөө жүрүп жатат.
