Өзгөн районунда Кемпир-Абад суу сактагычына байланыштуу тургундар жөө жүрүшкө чыгышты. Социалдык тармактын колдонуучулары жүрүштөн видео жарыялашты.
Алар колдоруна «Кемпир-Абад кыргыздын жери!», «Кемпир-Абад калсын!» «Кемпир-Абад түштүктүн Ысык-Көлү!» деген жазуулары бар плакаттарды көтөрүп алышкан.
УКМК төрагасы Камчыбек Ташиев 10-октябрда парламентте берген маалыматына ылайык, Кемпир-Абад суу сактагычынын алдындагы 4 485 гектар жерди Өзбекстанга берип, анын ордуна кенемте катары 18 миң гектар жер алуу пландалууда.
Алар Жалал-Абад облусундагы Гавасай тилкесинен 13 300,
Ала-Бука жана Оштун Кара-Суу районунан 4 127,
Өзгөн районунан 500,
Сузак районунан 500 гектар жер беришет.
Бирок Кемпир-Абаддагы сууну башкаруу үчүн эки өлкө биргелешкен ишкана түзүп, чогуу иштетет.