Президент Садыр Жапаровдун катышуусунда бүгүн, 26-сентябрда «Ата-Бейит» Улуттук тарыхый-мемориалдык комплексинде 14-17-сентябрда Тажикстандын куралдуу кол салуусунда курман болгон Чек ара кызматынын аскерлери – танк экипажынын мүчөлөрү Шерали Анаркуловдун, Санжарбек Анаркуловдун жана Жаңыбай уулу Тилектин сөөгү жерге берилди.
Атышуу учурунда Кыргызстан тараптын танкына снаряд тийип, экипаждын үч мүчөсү танк менен кошо өрттөнүп кеткен. Сөөктөрдү аныктоо үчүн тийиштүү экспертизалар жасалган.
Мамлекет башчысы курман болгондордун жакындарына жана туугандарына терең кайгыруу менен көңүл айтып, митинг-реквием өттү.
Президент белгилегендей, Баткен облусунун аймагында мамлекеттик чек араны коргоодо курман болгон жоокерлердин элесин түбөлүккө калтыруу үчүн «Ата-Бейит» улуттук тарыхый-мемориалдык комплексине эстелик коюлат.
Мамлекет башчынын сөзүнөн кийин аза маршынын коштоосунда Ардак кароол ротасы УКМКнын Чек ара кызматынын үч аскер жоокери – танкчылар Шерали Анаркуловдун, Санжарбек Анаркуловдун жана Жаңыбай уулу Тилектин сөөгүн жерге беришти.
Андан соң үч жолу асманга коштошуу огу атылып, жоокерлердин кабырына топурак салынып, куран окулду.
