Ош обусуна караштуу Өзгөн шаарында үч унаанын катышуусунда жол кырсыгы катталып, 13 адам жабыркады. Бул тууралуу Өзгөчө кырдаалдар министрлигинин басма сөз кызматы билдирди.
Маалыматка караганда, Өзгөн шаарынын Такачы көчөсүндө эки «Мерседес-Бенц» үлгүсүндөгү унаа жана «Дэу-Лабо» үлгүсүндөгү унаалардын катышуусунда жол кырсыгы катталган.
Кырсыктын кесепетинен 13 адам жабыркаган. Алардын ичинен сегизинин абалы өтө оор болсо, бешөө жеңил жаракат алышкан. Тартылган 4 куткаруучу жаракат алган жарандарды унаадан чыгарып, тез жардам кызматкерлерине өткөрүп беришкен.