Боом капчыгайында сел жүрүп, жол жабылган учурда баткакта унаа кыймылын көзөмөлдөгөн Жол кыймылынын коопсуздугун камсыздоо башкармалыгынын кызматкери сыйланды. Бул тууралуу Чүй облустук ички иштер башкы башкармалыгынын басма сөз кызматы билдирди.
5-августта «Бишкек-Нарын-Торугарт» унаа жолунун 135-136 чакырымында Боом капчыгайында үчүнчү ирээт сел жүргөн.
Окуяга күбө болгондор тизесине чейин ылайга баткан Жол кыймылынын коопсуздугун камсыздоо башкармалыгынын кызматкеринин видеосун бөлүшкөн.
Бүгүн, 9-август күнү Чүй облустук ички иштер башкармалыгы боюнча Жол кыймылынын коопсуздугун камсыздоо башкармалыгынын жетекчилиги тарабынан милициянын прапорщиги Жалилдин Бейшенбаевге ыраазычылык билдирип, министрликтин кол сааты тапшырылган.