Чүй облусунун Сокулук айылында үй өрттөнүп, 16 жаштагы бала каза тапты. Бул тууралуу Өзгөчө кырдаалдар министрлигинин басма сөз кызматы билдирди.
Кырсык бүгүн, 28-июнда болгон. Сокулук райондук өзгөчө кырдаалдар бөлүмүнө Тынчтык көчөсүндө №46 үй өрттөнүп жатканы боюнча маалымат түшкөн.
Жерине райондон эки бөлүм өрт өчүрүүчү барып, саат 11:31де өчүрүп бүтүшкөн.
Кырсыктан 71 жаштагы И.Н. аттуу кемпир уугуп калган. Ал учурда райондук оорукананын кардиология бөлүмүндө дарыланып жатканы айтылды. Андан тышкары 2006-жылы туулган К.А. аттуу бала каза тапкан. Анын сөөгүн ИИМ кызматкерлерине өткөрүп беришкен.
