Өзбекстандан Кыргызстанга ири суммадагы акча алып өтмөкчү болгон өзбек жараны кармалды. Бул тууралуу Өзбекстандын чек ара кызматы билдирди.
Чек арачылар Анжиян облусунун Пахта-Абад району тушундагы өзбек-кыргыз чек арасынан ушул эле райондун А.Д. аттуу тургунун токтотуп, текшерүүгө алышкан.
Натыйжада жарандын жанынан эки полиэтилен баштыкчага салынган 1 млн доллар табылган. Аны Кыргызстанга алып кирип кетмекчи болгону аныкталган.
Шектүүгө Өзбекстан Кылмыш кодексинин тиешелүү беренелери менен иш козголуп, тергөө жүрүп жатканы айтылат маалыматта.